Dende Xuventude de Rianxo veñen de confirmar a celebración, este ano, do Campamento de Verán 2020, unha xa clásica cita de lecer, creatividade e fraternidade que desta volta virá marcada pola crise sanitaria e que, polo tanto, incluirá en todos os elementos do seu programa (e do formato das actividades) medidas estritas de control e seguridade.
O Campamento de Verán Rianxo 2020 celebrarase do 13 de xullo ao 28 de agosto nas instalacións do Pazo de Rianxiño, do CEP Brea Segade de Taragoña e o CEIP Ana Mª Diéguez de Asados, seguindo, informou o Concello, “as recomendacións e medidas establecidas”. O horario será de 10:30 a 13:30 horas, e haberá Plan Madruga.
Nos vindeiros días, o departamento de Xuventude do Goberno local irá informando dos prazos e requirimentos de inscricións. Toda a información relativa á actividade irase publicando baixo o cancelo #camprianxo2020.
