Galiza Nova achegou á nosa comarca, a través dun concorrido acto reivindicativo, as cores dunha nova bandeira a prol da diversidade sexual. Fíxoo este martes 30 de xuño, ao abeiro das iniciativas de celebración do Día Internacional da Diversidade Sexual. As mocidades do BNG penduraron a bandeira LGBT+, ven visíbel, na praza do Centenario. Contaron coas intervencións políticas de Diana Lixó, responsable comarcal de Galiza Nova na bisbarra, e Rosana Pérez, candidata ao Parlamento Galego.
Rosana Pérez, na súa intervención, lembrou as propostas concretas que recolle o programa do BNG en materia de diversidade afectivo sexual: o impulso dunha nova lei galega que garanta os dereitos do colectivo LGBT+, “apostando pola sensibilización desde idades temperás”; a prevención do acoso nos ámbitos escolar, administrativo e laboral; e a visibilización da diversidade”.
A candidata avogou por unha nova lei galega de identidade de xénero “para avanzar na despatoloxización do colectivo transexual, atendendo as recomendacións da Organización Mundial da Saúde, e con medidas concretas tamén no ámbito sanitario”.
Diana Lixó salientoui que “queremos vivir nunha Galiza soberana, onde se respecten todos os nosos dereitos, sen vérmonos atacadas pola nosa identidade de xénero ou pola nosa sexualidade”.
