Un concelleiro popular boirense presentou no rexistro xeral do Concello a súa dimisión tras coñecerse que está a ser investigado por un presunto delito de violencia de xénero.
Segundo parece os feitos ocorrerían a pasada fin de semana na vila, onde reside a muller que interpuxo unha denuncia contra o seu antigo compañeiro sentimental nas dependencias da Policía Nacional de Ribeira.
O caso foi comunicado á Garda Civil boirense, lugar de residencia do presunto autor, e os axentes procederon a deter ao edil e a trasladalo aos calabozos. O domingo foi conducido ás dependencias xudiciais de Ribeira, onde o titular do xulgado de garda, decretou a súa posta en liberdade comunicada e sen fianza, ademais de interpoñer unha orde de afastamento da vítima.
As seguintes persoas que ían na lista do PP de Boiro son Paula García e Martín Romero, ás que se lles propoñerá facerse coa acta de concelleiro deixada polo dimisionario. Pero aínda non se decidiu, pois se está a expensas de falar con eles para coñecer a súa dispoñibilidade, segundo indicaron desde o Partido Popular.
A denuncia contra o exconcelleiro presentouna a súa exmoza, unha ribeirense de 35 anos, ao parecer, despois de que el acudise ao lugar de traballo dela e presuntamente estívoa acosando e molestando para pedirlle que retomasen a relación que mantiveran durante un par de anos, aínda que non vivían xuntos, e á que ela puxera fin.
Tras presentar a denuncia na comisaría ribeirense, esta última deu traslado á Garda Civil de Boiro para que procedese á detención do concelleiro, pois ten o seu domicilio nesa localidade, aínda que traballa nunha empresa do polígono industrial de Xarás (Ribeira). Tras o seu arresto, foi levado pola Benemérita aos calabozos da Policía Nacional na capital barbanzana.
