A pandemia de COVID-19 está obrigando a reformular boa parte das actividades de dinamización que estaban en activo nos nosos concellos, adaptándoas ás novas contornas tecnolóxicas, que ofrecen unha chea de posibilidades de interacción e comunicación a distancia. Un exemplo disto son os Talleres de Memoria que se estaban a impartir nas parroquias rianxeiras de Araño, Asados, Leiro, Rianxo e Taragoña, unhas actividades participativas para recuperar e poñer o valor o pasado do concello que, “ante a imposibilidade de desenvolver a súa parte docente e divulgativa de forma presencial”, tiveron que ser adaptadas ao ámbito dixital.
Segundo informan as organizadoras, para poder seguir desenvolvendo a iniciativa, as fichas de traballo achéganse a través de correo electrónico. As persoas que queiran recibir traballos deberán poñerse en contacto coas dinamizadoras Concha (696 798 204) e máis Chus (676 157 672).
