Co fin de clarificar e ordenar as máis recentes medidas de desescalada do Estado de Alarma polo COVID-19 e evitar riscos co gallo das saídas das nenas e nenos, o Concello da Pobra vén de publicar na súa web unha serie de propostas de paseos seguros polo termo municipal, ao tempo que lembra que a autorización para saídas de menores de 14 anos está restrinxida a 1 quilómetro de distancia como máximo da vivenda, o que pode guindar un panorama de saturación nas praias e paseos máis próximos ao centro urbano da Pobra, e unha presión menor nas máis afastadas.
A continuación, reflectimos as pautas dadas polo Goberno local para evitar riscos por demasiada afluencia de visitantes na praia dos Areos e no paseo das Xunqueiras:
· A praia dos Areos, como os restantes areais do concello, será unha zona de paseo máis: en ningún caso para ficar xogando no mesmo punto durante demasiado tempo e por suposto non se permite tomar o sol. Para reducir a posibilidade de cruzamento con outras persoas só se poderá pasear nun sentido, sempre do centro da vila cara ó Xobre. Poderase regresar a través do propio paseo dos Areos.
· No paseo das Xunqueiras, “debido ao estreito que é”, o risco de contaxio é alto cando se produce un cruzamento entre persoas, informa o Concello, que fixa un sentido da circulación único para todas as persoas paseantes: será obrigatorio sempre no sentido das agullas do reloxo, é dicir, será preciso incorporarse ó paseo sempre tomando cara á esquerda.
Estas son as propostas, prohibicións e recomendacións para a contorna do Xobre:
· Nas praias da Barca, da Lombiña e da Illa o sentido de circulación será sempre cara ó municipio de Ribeira. Serán “unha zona de paseo máis, en ningún caso para permanecer xogando no mesmo punto durante demasiado tempo e, por suposto, non se permite tomar o sol”.
· Os paseos da Alta e da Illa, da mesma maneira ca o das Xunqueiras, só se poderán percorrer no sentido das agullas do reloxo, é dicir, será preciso incorporarse ó paseo sempre tomando cara á esquerda.
Con estas medidas, informa o Concello, “procuramos diminuír o número de cruzamentos entre persoas paseantes e, polo tanto, o risco de contaxio”.
