Soldados da Brilat con sede en Figueirido (Pontevedra) chegaron a Ribeira e Rianxo, onde realizan tarefas de apoio ás autoridades locais e corpos e forzas de seguridade do Estado e auxilio a persoas necesitadas. Os soldados foron recibidos con aplausos e aclamacións polos veciños.
O despregamento de efectivos da Brigada Aerotransportable en Santa Uxía e na localidade rianxeira encádrase no marco da operación BALMIS de colaboración en distintos puntos do territorio co fin de establecer procedementos de actuación e as ligazóns cos corpos de seguridade locais.
O seu obxectivo é recoñecer as zonas máis conflitivas e infraestruturas sensibles, así como servir de apoio ás autoridades para o control e vixilancia de posibles incumprimentos das medidas establecidas polo estado de alarma nas zonas de especial risco para o contaxio.
