Onte celebrouse no CIFP Compostela o acto de entrega dos primeiros Premios ás Boas Prácticas de Educación Inclusiva co que se recoñece o traballo neste eido de oito centros educativos de toda Galicia nas dúas modalidades convocadas: a modalidade A, dirixida a centros de Infantil e Primaria; e a modalidade B, destinada a centros de ESO, Bacharelato e FP Básica.
Na primeira das categorías houbo representación da comarca, pois o pobrense CEP Pilar Maestú obtivo o segundo premio, dotado con 2.500 euros. Cun proxecto titulado A escola que soñamos e soñaremos, basearon o seu bo facer na participación activa das familias, querendo nenos e nenas “felices.” É dicir, unha escola que acolle á diferenza, na que tódalas capacidades son benvidas e que constrúe contornas seguras e acolledoras.
A conselleira de Educación, Universidade e Formación Profesional, Carmen Pomar, felicitou aos galardoados e amosou o seu agradecemento ao total de 74 centros presentados a esta convocatoria que foi creada co obxectivo de difundir as boas prácticas de inclusión educativa que se realizan nos centros docentes, e recoñecer o labor, esforzo e compromiso persoal e profesional que, neste senso, están a realizar os equipos docentes.
A este respecto, a titular de Educación subliñou que unas das prioridades do seu departamento é “a formación de persoas con valores, capaces de respectar a diversidade e de sacarlle o máximo partido.”
