O Concello de Rianxo quere pór o seu gran de area para facer que o confinamento da veciñanza sexa o máis levadeiro posíbel. Por esta razón, puxo en marcha un certame de creación de “contidos dixitais contra aburrimento na corentena”, o Rianxo Streaming Festival. O obxectivo é converter en fervedoiro de talento e participación a reclusión forzosa da xente nos seus fogares derivada do estado de alarma para frear o espallamento do andazo de COVID-19.
Co
gallo do festival poderase presentar todo tipo de contribucións
dixitais: música, contos, monólogos, divulgación, etc. Este
material será publicado na canle de YouTube ou compartidos nas
propias redes sociais co cancelo #RXtreaming. “O noso obxectivo non
é outro que combater o aburrimento e fomentar a creatividade, ao
tempo que reforzar o sentimento de pertenza a unha comunidade veciñal
tan activa como a rianxeira”, explican dende o Concello, debullando
os pasos para participar no certame.
1. Creamos o noso vídeo
Música, monólogo… o que se nos ocorra.
2. Enviámolo ou publicámolo
Podemos envialo á conta rs@concelloderianxo.gal ou publicalo e etiquetalo co cancelo #Rxtreaming
3 Cómpre avisar á organización do festival a través do Telegram ou WhatsApp no 667 18 55 77
4 Publicarase nas redes sociais e, de ser o caso, na canle específica de YouTube do festival.
O certame do Concello de Rianxo tamén incluirá o desenvolvemento dalgún reto concreto para as e os participantes.
