O Museo do Gravado de Artes celebrou esta fin de semana o segundo curso O Gravado V33, impartido novamente por José Fuentes Esteve, catedrático da Universidade de Salamanca, e polo artista Antonio Navarro.
É a intención do Museo, para conmemorar o 140 aniversario da publicación de Aires da miña terra, realizar unha exposición e editar un volume ilustrado deste poemario, primeiro libro dun dos grandes poetas do Rexurdimento, Manuel Curros Enríquez. Os participantes deste segundo curso colaborarán na exposición e na ilustración do volume coas obras realizadas no taller de gravado, así como fixeron os participantes do primeiro obradoiro.
O acto de entrega dos diplomas contou coa presenza da concelleira de Cultura de Ribeira, María Sampedro.
