Dous alumnos do CIFP Coroso (Ribeira), Óscar Laíño Carril e David Vázquez Teira, resultaron premiados no concurso Eduemprende Idea 2019, concretamente dentro da modalidade dirixida a estudantes de ciclos de grao medio, polo proxecto KAD Kids and animals detection.
O recoñecemento consiste na incorporación a un viveiro de empresas da Consellería de Educación, no asesoramento técnico do Igape e nunha dotación económica de 3.000 euros.
No acto de entrega dos premios, a conselleira de Educación, Carmen Pomar, felicitou aos participantes polo seu espírito emprendedor e destacou que “estades aquí algúns dos mellores expoñentes galegos do espírito emprendedor, motor do crecemento da economía e que favorece, tamén, a cohesión social ao contribuír non só ao voso desenvolvemento persoal, senón a darvos a oportunidade de mellorar a vosa empregabilidade en calquera ámbito ou situación”, lembrando que “outras persoas estiveron neste mesmo lugar, con proxectos premiados dos que algúns son hoxe empresas en funcionamento.”
Pola súa banda o conselleiro de Economía, Emprego e Industria, Francisco Conde, apuntou que os emprendedores xogarán un papel clave na Galicia do futuro. Conde tamén fixo fincapé en que a educación se converte no vehículo idóneo para implantar a cultura do emprendemento tanto entre os máis novos durante a etapa de formación coma no mercado laboral entre os profesionais.
