A academia The English Study Center de Boiro vai organizar, como cada ano, unha nova edición do seu festival solidario de Nadal, un certame centrado na participación, na solidariedade e na música tradicional (participan un cento de alumnas e alumnos da academia cantando diferentes panxoliñas en inglés, celebrando estas datas festivas ao tempo que afondan no seu coñecemento práctico da lingua inglesa). Este ano, o festival benéfico vai dirixido á Asociación Amicos.
Para a súa presentación, hoxe, acudiron Macarena Fernandez, Nerea Crujeiras e Felisa Piñeiro, que acompañaron no acto á concelleira de Servizos Sociais de Boiro, Marisa Collazo e á propietaria da academia Susana Blanco.
O evento celebrarase no pavillón da Piscina de Boiro, este venres 13 de decembro ás 18:30hs. A entrada terá un custe de 2€ e no seu transcurso farase un sorteo de diferentes agasallos cedidos por comercios do concello. As rifas terán un custe de 1€ cada unha.
Macarena Fernández agradeceu á academia que este ano, como novidade, usuarios de Amicos e nenos e nenas da academia teñan previsto cantar xunt@s varias panxoliñas, nas súas palabras “un gran paso a prol da inclusión e unha importante celebración do valor e o talento das persoas”.
Segundo se fixo saber na presentación celebrada hoxe, a vertente solidaria do festival con respecto aos proxectos de Amicos non é unha novidade, xa que a academia xa ten colaborado noutras ocasións coa asociación.