Usuarios da Asociación Amicos e máis de 600 escolares do concello de Boiro adentráronse no Festiritititi para desfrutar dunha xornada de inclusión no parque da Cachada, en Boiro. Así, nenos e nenas do CEIP Santa Baia, CEIP Praia Xardín, CEIP Abanqueiro, CEIP Cespón, CEIP Escarabote, CEIP Santa María do Castro e IES Praia Barraña uníronse á familia de Amicos no Día Internacional das Persoas con Diversidade Funcional para promover a inclusión real a través de numerosas actividades: xogos populares, oca xigante, pano, tira da corda, saltar a corda, atrapa o rabo, atrapa o topo, paracaídas, volei-globo, obradoiro de chapas e obradoiro con material de refugallo.
Ademais, o evento contou coa presencia de numerosas autoridades, para as cales tiñan preparado un xogo especial: o futbolín humano. Deste xeito, o director xeral de Maiores e Persoas con Discapacidade, Ildefonso de la Campa, exerceu de dianteiro e demostrou as súas dotes con este xogo, ao igual que o alcalde da Pobra do Caramiñal, Xosé Lois Piñeiro; a directora de relacións institucionais de Jealsa, Margarita Hermo; ou a concelleira de Política Social de Boiro, Marisa Collazo; entre outros.
A presidenta da Asociación Amicos, Esther Vidal, manifestou que era un día “moi importante porque se recoñece que as persoas con discapacidade teñen os seus dereitos e loitaremos por iso.” Tamén expresou o seu agradecemento a todas aquelas persoas e institucións que prestan a súa axuda e se implican, pois “necesitamos apoios e que lle dean unha oportunidade nesta sociedade ás persoas con discapacidade.”
O director xeral de Maiores e Persoas con Discapacidade, Ildefonso de la Campa, deu as grazas á sociedade civil, xa que “as actuacións no ámbito da discapacidade, no ámbito da atención ás persoas con discapacidade, se non tivéramos entidades como son Amicos ou o resto de entidades, ía ser moi difícil poder chegar a todas as persoas que o necesitan.” Do mesmo xeito, deulle as grazas aos alcaldes pola súa colaboración. Así mesmo, apostou por unha atención próxima e concluíu dicindo que “o que estamos facendo é multiplicar os nosos recursos contando, fundamentalmente, coas entidades e coa colaboración dos alcaldes e poñendo indudablemente os recursos públicos para poder chegar ao recoñecemento dos dereitos que teñen as persoas con discapacidade e o camiño que entre todos debemos facer para garantir unha vida o máis autónoma e o máis independente posible.”
Pola súa parte, o tenente de alcalde de Boiro, José Luís Ruiz, desexou que todos desfrutasen do día, “e nós desde o Concello encantados de que conten con nós para esta celebración, poñernos á súa disposición sempre que o necesiten para o que eles estimen oportuno.” Ademais, agarda que en próximas convocatorias volvan contar co Concello de Boiro para desfrutar do Festiritititi.
Na súa intervención, a directora de relacións institucionais de Jealsa, Margarita Hermo, expresou que “se algo nos enriquece como sociedade é isto, a integración. E empezar cos máis cativos é fundamental.” Neste senso, explicou que un dos eixos principais do programa de responsabilidade social corporativa de Jealsa é traballar cos máis pequenos e con persoas con capacidades diferentes, polo que, cando recibiron o convite de Amicos, “nos sentimos moi honrados e moi agradecidos porque creo que é unha iniciativa fantástica, que se debería extrapolar a moitos máis concellos e a moitas máis entidades”, xa que este tipo de encontros “enriquécenos a todos e fai que non haxa ningunha diferencia porque, ao final, as diferencias non existen mais que na nosa mente.”
Para rematar a xornada, a directora xeral de Xuventude, Participación e Voluntariado, Cristina Pichel, acudiu ao finalizar o espectáculo de maxia e entregou os diplomas a cinco alumnos da acción formativa Inclusión a través do xogo, curso de 25 horas impartido pola Asociación Amicos e financiado por esta Dirección Xeral.
