A Asociación Rianxeira de Empresarios (ARE) e Rianxo Centro Comercial Aberto (Rianxo CCA) veñen de anunciar unha máis que completa campaña de Nadal con importantes agasallos á fidelidade da veciñanza. En total, sortearanse 5.000 euros en premios, a maioría dos cales veñen da man dos propios establecementos participantes. Consisten sobre todo en vales de compra, vales por servizos, artigos varios e lotes de produtos. Ademais, a asociación aporta 3 vales de 100 € e outros 6 vales de 50 € para gastar nos establecementos adheridos á campaña.
Segundo informan as dúas entidades, os boletos para participar na campaña pódense conseguir realizando compras nos establecementos asociados participantes nela. Tamén insisten na importancia de que os clientes que reciban boletos e os cumprimenten deberán depositalos na urna do local onde se lles subministraron, co fin de garantir o óptimo desenvolvemento da iniciativa (os premios achegados por cada establecemento sortéanse entre os seus propios clientes).
O proceso de determinar os destinatarios dos galardóns realizarase ao longo de varios días: primeiro desenvolverase (en cada establecemento adherido) o sorteo dos premios aportados por este e logo, unha vez rematado este proceso nos comercios, celebrarase o sorteo dos vales da ARE na sede desta, o máis probábel que o 9 de xaneiro.
A ARE quere salientar “a gran implicación dos socios nesta campaña” e agradecerlles “o enorme esforzo que fan para poder levala a cabo: “Sen a súa colaboración sería imposible acadar a cifra de 5.000 € que se logrou este ano”, engade a asociación.