Remata o ano e toca facer balance. Neste senso, o BNG da Pobra avalía o traballo levado a cabo ao longo do 2019 e, especialmente, despois de que no mes de novembro Amparo Cerecedo e Xabier Santos tomasen posesión como novos concelleiros do grupo municipal. A voceira da formación, Amparo Cerecedo, valora “moi positivamente” o labor levado a cabo polo Bloque, argumentando “os compromisos que adquirimos dende novembro a aquí, conseguimos que teñan partidas orzamentarias e que se cumpren. Agora estaremos vixiando que se executen.” Así, fixo referencia á presentación de escritos por diversas cuestións, mocións ou as dúas propostas que levaron a pleno para incluír no POS+2020: a dotación á Confraría de Pescadores da Pobra do Caramiñal duns vestiarios e a colocación dun foco na zona de San Antón; ademais do arranxo e mellora do Camiño Real.
Ademais, consideran que o BNG exerce unha oposición “responsable e dialogante. Son outros os que non queren dialogar.” No que respecta ao goberno formado por Nós Pobra e PSdeG-PSOE, descríbeno como “irresponsable”, aducindo que existen asuntos que se levan a pleno tódolos anos, pero que “coma sempre chegan a última hora, tarde, mal e arrastro.” Tamén expresan que a miúdo se lles convoca con pouca antelación e incluso sinalan que na última sesión plenaria “había un punto na orde do día que na xunta de portavoces que tivéramos ao longo do mes, tampouco se nos comentara”, polo que “é todo un pouco caótico.” En relación a isto, outro dos adxectivos empregados polo Bloque para aludir ao goberno é o de “incompetente”, aducindo que están sen executar tódalas obras dos POS desde o 2017, agás unha, “e estamos falando que cada ano hai unha media de catro ou cinco.”
A formación nacionalista resume que se trata dun goberno “que vende moita pantalla, sobre todo, nas redes sociais de que o BNG non quere dialogar” e conclúe afirmando que o Bloque “ata o último momento está con acordos porque a prioridade son resolverlle os problemas aos veciños.”