Os cincuenta alumnos e alumnas asistentes programa Camiños de Coñecemento e Experiencia do IV Ciclo da Universidade de Santiago acudiron o pasado venres 13 de novembro a Compostela para participar nun acto académico de entrega de diplomas no paraninfo da Facultade de Historia.
De seguido, convidadas e convidados pola USC, asistiron á interpretación de O Mesías de Haendel a cargo da Real Filharmonía de Galicia no Auditorio de Galicia. Acompañou ao alumnado a concelleira ribeirense Ana Barreiro Rego.
O Cuarto Ciclo da USC é unha contribución formativa da Universidade para achegar os estudos ás persoas maiores de 50 anos das comarcas próximas a Compostela e Lugo (onde están os campus da USC). Entre outros, están incluídos nas súas actividades os concellos de Ribeira, A Pobra do Caramiñal e Rianxo, amais da Estrada, Muros, Outes, Teo, O Pino, Arzúa e Ordes. Por contidos, achégaselles aos estudantes sesións teóricas e prácticas de historia, música, medio ambiente e educación familiar.
Con esta iniciativa preténdese que a Universidade sexa “un pulmón de osíxeno do coñecemento tamén na contorna rural galega”, en palabras da USC.
