Máis dun cento de persoas anotadas nos obradoiros de arte floral de Ribeira

A localidade ribeirense de Carreira acolleu na tarde de onte o primeiro dos obradoiros de arte floral que se desenvolverá no municipio con motivo do Nadal e que, por vez primeira, viaxan ás parroquias, obtendo unha gran aceptación entre a veciñanza.

Neste senso, conseguiuse cubrir o número mínimo de persoas inscritas requirido para poder impartir esta acción. Así, celebrarase nas oito parroquias de Ribeira, exceptuando en Santa Uxía. En total, e a falla de cubrir algunhas vacantes se xorde máis xente interesada, son 117 as persoas anotadas.

O referido obradoiro desenvolveuse onte na Casa da Cultura de Carreira, contando coa participación de 10 veciñas, aos cales se lles fixo entrega de diplomas coa presenza do concelleiro de Comercio e Turismo, Ramón Doval.

Para hoxe en Corrubedo hai apuntados 14; mañá en Artes, 15; o luns en Palmeira, 17; o martes en Oleiros, 12; o mércores en Aguiño, 16; o xoves en Castiñeiras, 17; e o venres en Olveira, 16.

Por outra banda, o sábado 14, en horario de 10.00 a 14.00 horas, un elfo patinador circulará polo Malecón e polas rúas peonís da cidade coa fin de distribuír material informativo do novidoso Mercado de Nadal que se situará na praza de Porta do Sol a partir do venres 20, tendo lugar a inauguración ás 18.00 horas, e que estará integrado por 16 postos de produtos propios desta época coma xoguetes artesáns, turróns, doces, roupa e adornos de Nadal, intercambiándose cun mercado similar emprazado en Vilagarcía para variar o seu contido.