Un decembro máis, Cáritas Parroquial de Ribeira organiza o seu Festival Benéfico de Nadal, o cal se celebrará o 15 de decembro, ás 19.00 horas, no Auditorio municipal. Así o deron a coñecer esta mañá a presidenta da entidade, Teresa Pérez; o secretario, Manuel Mirás; e a concelleira de Cultura, María Sampedro.
A edil María Sampedro destacou o “labor extraordinario” que desenvolve esta organización, ademais de gabar as actividades de inclusión social e creación de emprego que levan a cabo. Tamén expresou o seu agradecemento porque “hai moitas veces que desde as entidades públicas non somos capaces de chegar a moitos sitios e aí están eles sempre botando unha man, arrimando o ombro e chegando a tódalas persoas que o necesitan.”
Na súa intervención, Teresa Pérez precisou que a finalidade deste evento “non é tanto para recadar, senón para concienciar á xente de que existe Cáritas e de que calquera que o necesite pódese acercar alí en calquera momento.” Así mesmo, explicou que o festival contará coas actuacións do grupo de pandeireteiras da Terceira Idade de Ribeira; o cantautor Álex Millet; a Coral Polifónica do Círculo Mercantil de Ribeira e, como novidade, o seminarista Ange Patrick, coa súa portentosa voz como xa demostrou noutras citas realizadas na cidade. O espectáculo é totalmente gratuíto e sortearanse agasallos entre os asistentes (os tíckets dos sorteos xa están a venta). Ademais, Teresa Pérez subliñou a boa sintonía e colaboración existente entre a organización benéfica e os Servizos Sociais do Concello.
Pola súa parte, Manuel Mirás fixo balance e salientou que están nos mínimos históricos en canto ao número de familias atendidas por Cáritas Parroquial de Ribeira nos seus 39 anos de traxectoria: un total de 133, cando nos peores tempos da crise se superaban as 300 familias e aínda o ano pasado estaba ao redor das 170.
A este respecto, detectaron que sobre todo se creou moito emprego nas conserveiras. A pesar disto, indicou que nun 25% dos casos a pobreza está cronificada.
Este ano Cáritas contratou unha educadora social con moi bos resultados e durante o Nadal levará a cabo novas iniciativas como a campaña de recadación de alimentos nos supermercados.
