Oitenta alumnos e alumnas do CEIP Frións e do Colexio Bayón desprazáronse esta mañá ata a Aula CeMIT de Ribeira para falar por videoconferencia con Papá Noel, quen se atopa en Laponia traballando arreo coa axuda dos elfos e renos.
As crianzas tiveron a oportunidade de transmitirlle que agasallos lles gustaría que deixase baixo a árbore. Así, a maioría das peticións centrábanse en bonecas e tarxetas de Pokémon. Pola súa banda, Papá Noel interesouse por coñecer se recollían os xoguetes, se comportaban ben ou como ía o curso escolar.
Esta actividade, promovida pola Xunta de Galicia coa colaboración do Concello de Ribeira, tamén dispuxo dunha sesión de contacontos. Ademais, a concelleira de Innovación Tecnolóxica, Ana Barreiro, e o alcalde Manuel Ruiz quixeron sumarse a este evento e aproveitaron para felicitar as festas á rapazada entregándolles un pequeno obsequio.
O rexedor manifestou que esta iniciativa enmárcase dentro da programación do Nadal, expresando a intención de brindarlle esta posibilidade a outros centros educativos e maior número de alumnado o próximo ano.
