O Nadal é tempo de celebracións, pero tamén son días moi indicados para mergullarnos na cultura. Esta é precisamente a proposta da agrupación teatral Airiños, que, xunto co Concello de Rianxo, vén de preparar un completo programa de espectáculos teatrais para a parroquia de Asados (no Centro Social da Atalaia). O programa Veladas de Inverno abrirase este venres 13, ás 19.30 horas, cunha peza de teatro infantil a cargo de Pereira de Lobos. Trátase do espectáculo Boas Noites, que ten como protagonista a unha nena que aínda non foi quen descubrir as vantaxes de descansar e durmir logo dunha intensa xornada de troula e xogos.
As actividades proseguen o sábado 15, cun contacontos ás 19.30 horas a cargo do Teatro Airiños, e o venres 20 cunha nova entrega de teatro para a rapazada, da man de Ogue 5 (Escola de Teatro Airiños), baixo o título Unha de contos descontados. Esta peza está prevista para as 19.30 horas.
As representacións continúan en Asados o sábado 21, con teatro xuvenil a cargo de Patakamakabra, da Escola de Teatro Airiños, que representarán a peza Lendatarias a partir das 19.30 horas.
Ao día seguinte, domingo 22, será a quen novamente de Teatro Airiños, que escenificará Unha primavera para Aldara, a partir das 18.00 horas. Como lembrarmos, Unha primavera para Aldara está dirixida por Amantia Coello e baseada nun texto de Teresa Moure, autora tamén de Herba Moura ou Ostrácia (a vida da amante de Lenin, Inessa Armand). A obra lévanos da man á Galicia do século XV, durante a Revolta Irmandiña, máis polo miúdo á vida dun convento rexido pola abadesa Aldara Eáns, que discorre con tranquilidade até que chega ás súas portas, en primavera, un guerreiro irmandiño ferido, Don Nuno, pedindo acubillo.
