O espectáculo Lambetadas estréase en Rianxo

28 Novembro 2019

A Sala Arcos Moldes do Auditorio municipal rianxeiro será escenario o venres 29, ás 20.00 horas, da estrea de Lambetadas, de Talía Teatro. Trátase dun espectáculo concibido a partir de textos de María Canosa, Séchu Sende e Santiago Cortegoso, e destinado a público familiar e infantil que ten como obxectivo fundamental a concienciación e posta en valor da lingua propia como elemento fundamental da identidade individual e colectiva na sociedade galega actual. Neste senso, varios textos son levados a escena baseándose no universo do clown e nas técnicas do teatro de obxectos. Mediante o xogo escénico e o humor, os dous protagonistas, pasarán por diversas situacións cómicas que os levarán, sempre desde unha linguaxe inocente, a encarnar múltiples personaxes con diferentes oficios e disciplinas. Pero acabarán descubrindo que a identidade está na propia lingua, porque con elas se poden saborear as lambetadas máis doces e variadas.

Ao acto de presentación desta cita asistiron o alcalde de Rianxo, Adolfo Muíños; o representante de Deleite e patrocinador, Pedro González; o director do espectáculo, Santiago Cortegoso; o director da compañía Talía Teatro e produtor, Artur Trillo; e María Ordóñez e Diego Rey, protagonistas da obra.

O rexedor Adolfo Muíños destacou que a estrea se celebra en Rianxo, percorrendo despois distintos puntos da xeografía galega. Tamén precisou que consiste nun proxecto con “compoñentes diferentes”, polo que convida a toda a veciñanza a asistir, especialmente, subliñando “o frecuente apoio e arroupe por parte do público de Rianxo que é moi amigo e amiga de vir ao teatro a representar.”

Artur Trillo manifestou que se trata da primeira incursión nun espectáculo cun patrocinio, “sobre todo, comprometido coa cultura do país.” Despois da estrea, recalarán o domingo 1 no Culturgal, para o resto do mes de decembro iniciar unha xira intensa de quince funcións por toda Galicia, sendo a escolla dos concellos intencionada para que “nos sintamos arroupados.” De feito, apunta que elixiron Rianxo polas instalación, público e o bo trato. A xira continuará ao longo do 2020 e agardan que “dalgunha maneira, teñamos unha certa estabilidade neste sector.”

Pola súa parte, o representante de Deleite, Pedro González, indicou que a marca nace para evitar intermediarios e chegar directamente co leite ao consumidor, pero ten “unha aposta decidida pola cultura e polo apoio do talento galego.” Por iso, contactaron con Talía Teatro para chegar ás vilas medianas e potenciar o uso do galego, confiando no labor desta compañía polo seu talento.

Santiago Cortegoso explicou que lles supuxo un reto “importante” afrontar este espectáculo tratando o tema da lingua galega, “dalgunha maneira, intentar concienciar ou achegar unha sensibilidade aos nenos cara o idioma propio porque agora os nenos, igual, non ten as bases para entender a situación sociocultural do idioma, nin os maiores o entendemos.” Deste xeito, afirmou que tamén é un reto “necesario”, facendo referencia a que o uso do idioma galego está en retroceso nese rango de idade, especialmente nas cidades e vilas grandes, polo que “todos os esforzos que poidamos facer, tamén desde a cultura e desde o teatro, por intentar reverter iso, intentar crear unha imaxe cara o galego e unha conciencia cara ao idioma propio, pois cremos que é fundamental.”

Finalmente, os protagonistas María Ordóñez e Diego Rey expuxeron que o universo do clown foi todo un divertimento, “un deleite e unha lambetada.” Ademais, sinalaron que o obxectivo é abordar “unha cuestión moi delicada, pero facer que o espectáculo entre ben, coma un bo caramelo.”

A sinopse describe a dous personaxes excéntricos que entran en escena. Como non saben quen son, nin de onde veñen, nin cara a onde van, non lles queda máis remedio que coñecérense, tanto un ao outro como a eles mesmos. O que descobren é que para atopar a súa identidade deberán saber o que lles pasa ás súas linguas. Porque sen unha lingua propia chea de saúde non se poden lamber as lambonadas, que é o máis rico que hai.

A entrada é de balde e as persoas interesadas deberán retirar os convites na billeteira do Auditorio desde unha hora antes do espectáculo.

Outros artigos

Adiado en Rianxo até o 17 de maio o acto de homenaxe a Rosalía

A Área de Cultura do Concello de Rianxo confirmou hoxe que por mor das condicións climáticas adversas previstas para este venres 23 de febreiro, o acto en lembranza de Rosalía de Castro que estaba previsto para a dita xornada na praza de Padrón (no paseo da Ribeira a...

+

Publicidade

Revista en papel

Opinión

“Reto astrolabio”. Alberto Barciela

“Reto astrolabio”. Alberto Barciela

El mar merece respeto, aun así reclama y admite audacias, quizás motivadas por el horizonte casi infinito. El ser humano, en la búsqueda de sí mismo, de completar inquietudes y afanes, de responder a su curiosidad, acepta con gusto el reto de los nuevos rumbos,...