Estes primeiros días de novembro celebrouse en Santiago, no Auditorio de Galicia, a 13 edición do Certame Galego de Bandas de Música, que organiza a Federación Galega de Bandas Populares. Na cita as diferentes agrupacións comezaron cadansúas participacións interpretando pasodobres a xeito de presentación, para logo meterse en faena, no concurso, cunha peza de libre elección e outra de autoría galega proposta pola organización. Unha das bandas máis destacadas do certame resultou ser a Banda da Escola de Música de Rianxo, que brillou con luz propia.
A agrupación que dirixe Rafa Moares, que concorreu por vez primeira na súa historia na sección primeira do concurso (a de bandas con máis de 70 membros), obtivo un máis que destacado terceiro premio, con 485 puntos, só superada pola Banda de Meaño (con 540) e a de Vilatuxe (con 509). Na súa actuación, a banda rianxeira interpretou un pasodobre de Enrique Melio e máis a peza A rapa das bestas, de Simón Couceiro Riveira, que foi a peza proposta pola organización para a sección primeira do concurso.
