20191001 Este domingo houbo derbi barbanzán de Preferente: o duelo entre o Noia e o Puebla en casa dos primeiros (San Lázaro), un partido que prometía ser rifado coma un choque de trens (o Noia chegaba nun bo momento de forza e os da Pobra con moi poucas intencións de ceder a segunda praza da clasificación, que finalmente segue a manter con 14 puntos por debaixo do Viveiro) e que brindou un choque igualado de enerxías que se acabou reflectindo no resultado (1-1) e, tamén, no propio desenvolvemento do xogo.
No partido, iso si, comezou dominando o cadro local, para logo, co avance do encontro, irse igualando as forzas. En contra, os xogadores tiveron unhas condicións climáticas realmente adversas, cunha chuvieira que non cesou de caer en ningún momento do choque e que previamente enchoupara a fondo o campo de xogo.
Noia Club de Fútbol: Alberto Pajarillo, Rendo, Juanjo, Angelo, Juan Diego, Canabal (substituído por Jacobo Tato no minuto 58), Nando (substituído por Felipe Blanco no 82), Hugo, Anxo, John (Marcos Lado no minuto 58) e Seijas (Tachi 65’).
Pobra: Juan, Lugo (Aless 55’) Manuel María (Piñeiro 69’), Pablo Pérez, Manu Soto (Teira 77’), Adrián Pereira, Nacho Figueira, Falcón, Madiop, Juan García (Xabi 46’) e Picos.
Gol do Noia: 1-0, Juan en propia meta no minuto 35.
Gol do visitante: 1-1, Madiop de penalti no minuto 52.
Árbitro: Miño Pico, Alejandro, de Ferrol. Sacou tarxeta amarela aos locais Anxo, John, Hugo e Marcos Lado e aos visitantes Lugo e Manuel María. Expulsou con vermella directa a Angelo no minuto 51.
