20190924. O grupo municipal do BNG pobrense levará a pleno unha moción respecto da situación das rúas do concello. Desde a formación sinalan que foron “temas recorrentes a sucidade das rúas, a presenza de cheiros de sumidoiros e contedores do servizo municipal de recollida do lixo, a presenza, sen seren convidadas, das ratas, e dende logo a vexetación descontrolada que invade camiños, rúas e mesmo beirarrúas, alá onde as hai.”
Neste senso, manifestan que as rúas urbanas máis afastadas do centro, tales como Rafael Dieste e Alexandre Bóveda, a situación na que se atopan “é autenticamente lamentable, uníndose en igualdade de condicións coas do rural. A isto podemos engadir a sucidade das rúas empedradas do centro da Pobra, que acumulan roña ata o punto de que a súa cor cada vez se aproxima máis ao negro.”
Así mesmo, engaden que “o lixo, o cheiro, a maleza están comendo cada vez máis terreo no noso concello e iso esixe actuacións, urxentes unhas, e concienzudamente planificadas outras para rematar definitivamente cunha situación que o BNG vén denunciando reiteradamente desde hai anos.”
Por todo isto, o Bloque local propón que o goberno municipal inicie “con urxencia” unha limpeza xeral das rúas urbanas, incluíndo a eliminación de vexetación que invade as beirarrúas; a limpeza e adecuación das cunetas, regos, rexistros e demais elementos do sistema de recollida de pluviais, tanto nas zonas rurais coma nas urbanas; e o establecemento dun programa de saneamento e limpeza de beiravías, beirarrúas, cunetas e regos co obxectivo de evitar o asolagamento de rúas e camiños.
