20190906 O Proxecto Apego no Concello de Rianxo vai apostar de cheo pola formación familiar integral en materia de alimentación: pola adquisición e o intercambio de coñecemento sobre saúde nutricional onde nais, pais e profesorado sexan tamén unha parte activa.
Estas actividades sobre alimentación saudábel terán tres vertentes: uns obradoiros de disciplina positiva (cinco sesións, en primavera, impartidas pola pedagoga María Paredes), uns faladoiros de hábitos alimenticios positivos (cinco sesións, o 25 deste mes e os días 2, 9, 16 e 23 de outubro, impartidos por Lida Folgar, experta en nutrición infantil) e unhas sesións de mindfullness en familia (media ducia de sesións, os días 25 e 31 de outubro e os días 8, 15, 22 e 29 de novembro, imparte a pedagoga familiar Raquel Bello de Espazo Oikos).
As actividades desenvolveranse no Auditorio de Rianxo. O programa diríxese a familias con crianzas e persoal educativo (docentes de ensino infantil e primario, educadoras e educadores de garderías, persoal de ludotecas ou responsábeis de comedores escolares, entre outros colectivos).
