20190916 Medra a pasos axigantados a incerteza arredor dos efectos do quecemento da Terra, que levan xa tempo facéndose notar ben preto da nosa terra, e as nosas entidades, colectivos e grupos de artistas non queren quedar á marxe dos chamamentos, das mobilizacións e das concentracións. Estes días, sen ir máis lonxe, a Biblioteca Municipal da Pobra confirmou a súa participación na Folga Mundial contra o Cambio Climático, que se desenvolve os días 20 (convocando aos estudantes) e 27 de setembro (a nivel xeral) deste mesmo ano. A xeito de actividade de adhesión mobilizadora e chamada de atención, a biblioteca organiza o día 18 de setembro un contacontos con Iolanda Eiras e o escultor Camilo Seira.
O argumento do espectáculo xira arredor dun mundo máis ancestral có que coñecemos, onde todos os seres que habitan a Terra teñen a capacidade de falar, todos agás un ser vivo en concreto: a árbore calada. “Neste conto”, explican os responsábeis do mesmo, “tomaremos conciencia sobre a importancia de coidarmos a terra e sobre o poder devastador do lume”. A actividade inclúe un obradoiro plástico de modelaxe en barro, o obradoiro Que facer coa terra. Estará dirixido a nenas e nenos de 3 a 14 anos e será ás 18.00 horas.
