20190806. A Policía Nacional de Ribeira detivo a un home de 32 anos, natural de Ribeira, como presunto autor dun delito contra a saúde pública, na modalidade de tráfico de drogas, desmantelando así un punto de venta de drogas nun domicilio utilizado como narcopiso para a distribución e venta de sustancias estupefacientes a traficantes a pequena escala e consumidores.
Tras conseguir autorización xudicial, os axentes interviñeron 310 gramos de cocaína, 200 de heroína, 300 de haxix, 30 de MDMA e 17 de crack. Así mesmo, incautaron máis de 6620 euros en efectivo en billetes de diverso valor e moedas, dúas libretas bancarias, dous discos duros, un ordenador portátil, dous móbiles, dúas balanzas de precisión, dúas xerras de cristal con medida para o preparado de estupefacientes e outros elementos para a elaboración das sustancias.
Ademais, atoparon un can da raza pitbull, o cal foi entregado ao Servizo Galego de Lacería.
O detido contaba con varios antecedentes policiais e xa pasou a disposición xudicial. A investigación continúa aberta, polo que non se descartan máis detencións.
