20190809. O delegado territorial da Xunta de Galicia na Coruña, Ovidio Rodeiro, manifestou que a Consellería de Cultura e Turismo destina case 200.000 euros aos concellos da área do Barbanza a través das diferentes liñas de axudas. En primeiro lugar informou das axudas para o fomento da accesibilidade e sinalización dos recursos turísticos no medio rural. En segundo lugar valorou as achegas para a contratación de persoal nas oficinas de Turismo, e en terceiro lugar analizou as axudas para a promoción das festas de interese turístico de Galicia, coas que se apoia a súa difusión e promoción e se incorpora ademais a cobertura dos gastos para a posta en marcha da campaña de información e sensibilización fronte á violencia sexual en espazos públicos emprendida no marco do Pacto de Estado contra a Violencia de Xénero.
O delegado territorial destacou que “as achegas para a mellora da accesibilidade e sinalización dos recursos turísticos van dirixidas a mellorar a calidade dos recursos turísticos dos concellos para facelos máis atractivos aos visitantes.” Neste senso, apuntou que “estas subvencións están orientadas ao fomento e posta en valor da riqueza histórica, cultural, patrimonial e paisaxística dos municipios.”
Concretamente, na zona do Barbanza recibirán estas subvencións a Agrupación Ría Muros-Noia, Boiro, Muros e Porto do Son.
Ademais, o Goberno galego ampliou os fondos dirixidos a concellos, mancomunidades ou xeodestinos, entre outros, co obxectivo de afondar na colaboración coas administracións locais e mellorar as infraestruturas turísticas a través do seu embelecemento e a mellora da sinalización ou da accesibilidade, principalmente.
Nas convocatorias da Consellería de Cultura e Turismo inclúense tamén as subvencións para a contratación de persoal nas oficinas de turismo que recibirá A Pobra do Caramiñal, Muros, Outes, Lousame, Muros, Noia, Porto do Son e Ribeira.
Así mesmo, recóllense as axudas aos concellos para o apoio, promoción e difusión para as festas declaradas de interese turístico de Galicia que en 2019 beneficiará á Festa do Nazareno de A Pobra do Caramiñal, ao San Ramón de Bealo de Boiro, ao Gran Premio de Carrilanas de Muros, á Festa de Guadalupe de Rianxo e á Festa da Dorna de Ribeira.
Esta terceira liña de axudas céntrase na promoción das festas de interese turístico de Galicia, coas que se apoia a súa difusión e promoción e se incorpora ademais a cobertura dos gastos para a posta en marcha da campaña de información e sensibilización fronte a violencia sexual en espazos públicos emprendida no marco do Pacto de Estado contra a Violencia de Xénero. Estas axudas chegarán aos concellos de A Pobra do Caramiñal, Boiro, Muros, Rianxo e Ribeira.
Estas partidas destínanse aos concellos galegos nos que se celebren algunha das 124 festas de interese turístico e contribúen ao apoio, promoción e difusión das celebracións. Tamén inclúe a posta en marcha, durante a festa, da campaña Agresión Off, Eu digo non á violencia sexual.
As festas poden obter unha axuda de 6.000 euros, xa que as actuacións subvencionables relativas á promoción e difusión poderán acadar un máximo de axuda de 3.000 euros e as relativas á campaña de información e sensibilización fronte a violencia sexual en espazos públicos outros 3.000. En total, a liña de subvencións conta cun investimento global superior aos 600.000 euros coa colaboración entre a Consellería de Cultura e Turismo e a Vicepresidencia, Consellería de Presidencia, Administracións Públicas e Xustiza.
Do mesmo xeito, a Consellería de Cultura e Turismo conta cun convenio coa entidade financeira Abanca, polo que cada celebración pode acceder a unha axuda adicional de 1.500 euros.
