A nosa mocidade fará labores de voluntariado ambiental en Sálvora e no Parque Natural de Corrubedo

20190807 O medio ambiente, calquera pode velo, precisa de todos nós, das nosas accións cotiáns e voluntarias de protección e concienciación (accións como comunicar a aparición dun animal en apuros, retirar plásticos da praia ou reciclar correctamente, entre outras moitas cousas). Esta concienciación medra entre a xente nova e a Dirección Xeral de Xuventude quere achegar fórmulas para que medre e se materialice alí onde máis se precisa. Disto trata o proxecto europeo LEWO (Life Evergren with Volunteer) que ten aberto o prazo de inscrición e que consiste en abrir á mocidade as portas do voluntariado ambiental en zonas concretas da nosa xeografía de gran valor medioambiental, incluídos o Parque Nacional das Illas Atlánticas e o Parque Natural de Corrubedo.

Trátase a segunda quenda neste ano da iniciativa, aprobada ao abeiro do programa LIFE 2016 da Comisión Europea, e ofértanse un total de 360 prazas para persoas entre os 18 e 30 anos.

Segundo informa a Dirección Xeral, departamento que coordina na nosa terra o dito proxecto europeo, a xente nova interesada poderá anotarse nas intervencións programadas até tres días antes da realización de cada actividade e a admisión será por orde de inscrición, ata cubrir a totalidade das prazas convocadas.

Máis polo miúdo, haberá accións de mantemento, sensibilización e divulgación ambiental nos Parques Naturais da Baixa Limia-Xurés, no de Monte Aloia; na Ribeira Sacra-Canóns do Sil, no Courel, no Parque Nacional Marítimo Terrestre das Illas Atlánticas e no complexo dunar de Corrubedo. Tamén intervirán nas Reservas da Biosfera do Río Eo, Oscos e Terras de Bourón, das Mariñas Coruñesas e Terras do Mandeo, e Terras do Miño.

Toda a información das datas e características das actividades propostas poden consultarse na páxina web de Voluntariado Galego.

O proxecto LEWO ten tres obxectivos fundamentais:

· Contribuír á redución do impacto que a acción humana ten sobre o patrimonio natural.

· Facer sustentábel o uso de recursos naturais.

· Promover a educación ambiental e a participación cidadá no coidado da natureza.

Amais, a finalidade última no caso concreto da nosa terra é “potenciar o patrimonio natural de Galicia a través da creación dun grupo de mocidade voluntaria que realizará diferentes actividades dentro de 17 dos hábitats naturais da rede Natura 2000 e áreas especiais de protección de aves en Galicia”.

As persoas voluntarias desenvolverán actividades de preservación e conservación, de investigación (catalogación de flora e fauna de Galicia) e de educación (sensibilización, formación, exposición).

A iniciativa está aberta á participación de mozas e mozos de entre 18 e 30 anos.