20190704 Rianxo viaxa esta finde ao pasado. Mellor dito: viaxa a como debía soar a música hai unha manchea de séculos, na Idade Media. A clave desta viaxe (a panca da máquina do tempo) é a zanfona, que é histórico instrumento medieval arredor do que xira a edición número 15 do Encontro Internacional Zona de Zanfona, festival temático único na Península.
Unha vez máis, organiza aCentral Folque en colaboración co Concello. As actividades intensificaranse a partir deste venres. 5 de xullo, aínda que o ambiente zanfoneiro xa se fai por sentir: unha sensación de que a Idade Media aínda segue presente en determinados recantos da vila, só fai falta reavivala. Isto foi aplicábel ao mercadiño rianxeiro do mércores, que acolleu a presentación/apertura do encontro.
Entre outras cousas, haberá presentacións de discos, por exemplo 13 Cancións bonitas de Germán Díaz e Benxamín Otero, este venres ás 22.30 na praza Rafael Dieste; ou Baile en Massó, a cargo de Obal, o sábado pola noite. O programa tamén inclúe o entremés O conto da zanfona con María e Manuela (adaptando a historia da cega Rosa María do Val). Os concertos celebraranse na praza Rafael Dieste con entrada libre e partir das 22.30 h.
Este ano as entidades organizadoras volveron poñer o foco en ofrecer “un programa diverso” e para todos os públicos sobre “este fabuloso instrumento” en palabras de aCentral Folque, unha entidade longamente experimentada na promoción da zanfona (máis de vinte anos de andaina divulgadora). “O ZdZ ofrece na vila mariñeira e literaria de Rianxo unha desculpa para vir e desfrutar de concertos, cursos e convivio arredor da zanfona”, engade a organización.
A xeito de “petisco e apertura do festival”, recuncou a animación do mercadiño semanal de Rianxo dos mércores co concerto ambulante e presentación aos medios a cargo de Alba María e Ariel Ninas.
Os cursos desta edición para zanfona están impartidos por Óscar Fernández na iniciación e Paulo P., no nivel avanzado. Hai tamén un curso de danzas galegas e europeas, como preludio para o baile do sábado, a cargo de Mercedes Prieto.
O ZdZ continua tamén coa divulgación de repertorio musical ligado ao devandito instrumento coa segunda entrega do Cancioneiro #ZdZ, publicación de acceso gratuíto e descarga libre que “pretende ser unha escolma de cancións coas contribucións dos docentes de escolas de zanfona de Galicia”.
Programa Zona da Zanfona
Mércores 3 xullo
Concerto Ambulante Mercadiño Praza Castelao. 12 h
Ariel Ninas & Alba María. Animación de rúa durante a celebración do mercado semanal de Rianxo o mércores na praza Castelao, presentación do ZdZ con concerto entre os postos do mercadiño.
Venres 5 xullo.
Concerto ZdZ Praza Rafael Dieste. 22.30 h
Germán Díaz e Benxamín Otero: 13 cancións bonitas + María e Manuela: O conto da zanfona
Curso Zanfona (iniciación) Auditorio de Rianxo. 16 – 20 h. con Óscar Fernández.
Sábado 6 xullo
Baile Assalto ZdZ. Praza Rafael Dieste. 22.30
Obal: Baile en Massó. Música ao vivo para baile popular.
Cursos ZdZ. Auditorio de Rianxo.
Curso zanfona (avanzado) con Paulo P (10 h-19 h). Curso baile con Mercedes Prieto (16.30-20.30)
Domingo 7 xullo
Palco ZdZ: Xuntanza de zanfonas. Praza Rafael Dieste. 12 h.
14.30 h Xantar ZdZ + 17 h Foliada ZdZ.
