20190724. Un total de 16 alumnas e alumnos formáronse nos últimos nove meses no ámbito de Pavimento e Albanelería de Urbanización, grazas a un obradoiro de emprego que contou cunha achega da Consellería de Economía, Emprego e Industria de 253.000 euros. Os alumnos comezaron a formación teórica e práctica o pasado mes de outubro e concluirá nuns días.
O delegado territorial da Xunta na Coruña, Ovidio Rodeiro, visitou este taller de emprego ‘Arcos Moldes II’ financiado pola Xunta coa colaboración do Concello de Rianxo e puxo en valor que a maioría dos obradoiros recollen na súa parte práctica actuacións en zonas públicas que melloran o estado do municipio, algo que beneficia aos alumnos e ao concello.
O representante do goberno autonómico comprobou o resultado dos traballos prácticos dos alumnos que consistiron na reparación e mellora dos pavimentos do Paseo Marítimo, das beirarrúas da estrada AC-305 entre Campo de Pasos e Ourolo e da Urbanización da Martela.
Ovidio Rodeiro destacou na súa visita que “estes talleres permiten aos participantes obter unha cualificación profesional que favorece a súa posterior inserción laboral. Esta formación impulsa tamén o emprendemento, xa que os beneficiarios reciben formación específica que lles permite iniciar os seus propios proxectos.” Ademais, o delegado territorial felicitou a todos “porque a partir de agora estades mellor preparados que fai 9 meses para atopar un emprego, xa que a vosa formación adaptouse ás necesidades das empresas desta comarca.”
Os municipios da zona do Barbanza contaron en 2018 cun total de 6 obradoiros de emprego, 4 deles de carácter dual, onde participaron alumnos e alumnas de calquera idade e 2 de Garantía Xuvenil, para mozos e mozas menores de 30 anos. Mediante estas iniciativas a Consellería de Economía, Emprego e Industria investiu en políticas activas de emprego 1.431.491 millóns de euros.
Os talleres ordinarios contan con formación e un acceso a un contrato de traballo durante nove meses e os duais, a maiores, ofrecen 3 meses máis de traballo nunha empresa da zona na especialidade na que se forma o alumnado.
Os obradoiros duais tiveron lugar en Muros, compartido con Carnota, Ribeira, compartido con Porto do Son, Outes, compartido con Noia e Lousame e Rianxo. Pola súa banda, os obradoiros do Sistema de Garantía Xuvenil, realizáronse en Boiro e Rianxo.
Estes obradoiros permitiron que un total de 108 persoas desempregadas se formasen nun oficio mentres realizaron tarefas en beneficio de espazos e instalacións públicas. Os participantes reciben un certificado de profesionalidade con validez en todo o Estado. A duración dos obradoiros xerais foi de 9 meses e os de Garantía Xuvenil de 6 meses.
