20190710 Este mes non fai falta irse lonxe para vivir festivais e facelo á nosa maneira: recollendo o espírito campestre das romarías e, coloquialmente falando, botándonos ao monte. Unha cita para subliñar no calendario é a nova edición, a doceava, do Festival AntrosPinos de Taragoña, en Rianxo. Será os días 26 e 27 de xullo.
Actuarán grupos de recoñecido espírito festeiro e de probada valía ante os embates da troula prolongada: Terbutalina, NAO, Funky Style Brass, Machete En Boca, Balkan Bomba, Orquesta Neverloura, The Lelli Kelly’s, Pachanguito e La SinCereza.
A cita vén da man da Antros Pinos Fap Asociación de Taragoña e as súas orixes remóntanse a 2008. É un festival de entrada libre, ideal para quen queira desfrutar durante dúas xornadas enteiras de música, romaxe e outras actividades festeiro-culturais e de confraternidade. A edición deste ano estrea escenario de actuacións: o recinto de Campo Maneiro. O festival conta coa axuda e patrocinio de Metales Taragoña, Tarrío Suárez, Autocares Muíños, @Fesba e Noratattocompostela.
