Educación convoca os premios ao esforzo e superación persoal para o alumnado de ESO

20190711. A Consellería de Educación, Universidade e Formación Profesional convoca os premios de Educación Secundaria Obrigatoria ao esforzo e á superación persoal correspondentes ao curso 2018/2019, cos que se recoñece o traballo daquel alumnado que cursou 4° de ESO durante o curso académico que acaba de rematar e conseguiron “superar as súas dificultades de tipo persoal, educativas ou do contorno familiar ou sociocultural, no marco dun ensino comprensivo e integrado.”

A Consellería destina un total de 15.000 euros para estes premios a razón de 750 euros por cada un dos 20 galardóns que se conceden; e os interesados dispoñen dun mes de prazo para tramitar as solicitudes.

O obxectivo final destes recoñecementos é que os premiados sexan “un exemplo para compañeiros e compañeiros en situacións similares, poñendo en valor o especial esforzo que supón acadar o éxito na escola para os estudantes que proceden de contornos socioculturais desfavorecidos, de contornos familiares disfuncionais, en proceso de superación de enfermidades crónicas ou con discapacidades que condicionan o seu rendemento escolar, a súa relación persoal ou a súa inserción social.”