20190716. A corporación municipal da Pobra do Caramiñal aprobou a dedicación exclusiva do alcalde, Xosé Lois Piñeiro, cunha retribución de 43.000 euros brutos anuais. A proposta foi aprobada cos votos a favor de Nós Pobra, do PSdeG-PSOE e coa abstención do PP e unha do BNG, pois a outra edil da formación non puido acudir.
O pleno extraordinario e urxente arrancou coa renuncia de José Carlos Vidal, edil de Nós Pobra. Ademais, foron retirados da orde do día os tres puntos correspondentes coa segunda dedicación exclusiva, o cargo de libre designación e as retribucións a percibir por parte dos grupos por asistencia a plenos e comisións.
Finalmente, o pleno aprobou a substitución da rede de iluminación para instalar luces led, por un importe de preto dun millón de euros. Esta actuación poderá realizarse gracias a unha subvención de 753.000 euros do Instituto para a Diversificación e Aforro da Enerxía (IDAE), dependente do Ministerio para a Transición Ecolóxica, e aportando o Concello 188.300 euros. A firma Imesapi é a adxudicataria deste proxecto que suporá un aforro de ao redor de 200.000 euros.
