20190729 O Concello da Pobra vén de presentar un novo servizo de interese para a cidadanía. Trátase dunha iniciativa de información e atención do Colexio Oficial de Graduados Sociais da Coruña e Ourense, que atenderá ás veciñas e veciños do municipio ofrecéndolles asesoramento cando o requiran, comprometéndose a subministrar unha contestación ás súas demandas laborais e xurídicas nun prazo que non irá máis alá das 24 horas.
O servizo de asesoramento, que se vai subministrar de balde, será o primeiro destas características que se pon en marcha na comarca. Foi posíbel grazas a un convenio entre o Concello e os colexios oficiais de graduados da Coruña e Ourense. A iniciativa foi dada a coñecer no auditorio Valle-Inclán, onde se fixo fincapé que A Pobra é a segunda localidade onde está operativa logo da súa posta en marcha, hai dous anos, na propia cidade da Coruña.
