O Concello de Muros vén de adherirse ao proxecto Cardi@ngel, unha iniciativa pioneira en Galicia que busca crear unha rede de voluntarios formados en reanimación cardiopulmonar (RCP), localizables a través dunha aplicación móbil en situacións de emerxencia.
A través da app gratuíta dispoñible en www.cardioangel.es, calquera persoa pode rexistrarse como usuario Cardi@ (quen solicita axuda) ou @ngel (quen está capacitado para intervir). En caso de urxencia, a aplicación permite lanzar unha alerta que chega aos voluntarios máis próximos, grazas á xeolocalización.
Para dar a coñecer esta ferramenta e formar novos voluntarios, este sábado 29 de novembro celebrarase unha sesión aberta á veciñanza na Escola de San Xosé, de 11:00 a 13:00 horas. A actividade incluirá formación práctica en RCP e información sobre o funcionamento da app.
“Daremos formación á veciñanza e ao tecido asociativo local, porque os primeiros minutos despois dun infarto son decisivos para salvar vidas”, sinalou Sandra Maneiro, concelleira de Seguridade Cidadá. Pola súa banda, a alcaldesa María Lago expresou a súa satisfacción por que Muros forme parte “dun proxecto que combina prevención, formación e solidariedade”, confiando en que Cardi@ngel sexa un éxito no municipio.
O proxecto, que leva por lema “As túas mans poden salvar unha vida”, foi recoñecido recentemente nos premios nacionais ‘DKV Impacta’ pola súa innovación social en saúde.
