A ANPA Santa Uxía do CEIP O Grupo de Ribeira comeza a semana con mobilizacións, seguindo a liña da concentración do pasado 8 de setembro, organizadas en colaboración co claustro e o equipo directivo do CEIP, para reclamar o nomeamento urxente dun/a substituto/a para a titoría de de 3ºB de E.P.
A ANPA decidiu concentrarse todos os luns ás 11:30 h ata que este mestre/a sexa nomeado. Seguindo este fío, este luns luns 15 de setembro celebrarase nas portas do centro unha nova cacerolada, entre as 11.30 e as 12.00 horas. Reclamarán como dixemos a incorporación de profesorado titor de 3ºB pero tamén de profesorado NEAE, de persoal de desdobres, apoio e coidados.
Nas protestas porase o foco na división do equipo directivo, nas obras sen rematar, na falta de espazos axeitados para o labor docente e nas dificultades para a atender o alumnado.
Tamén foron convocadas todas as familias do alumnado do CEIP, sexan ou non socias da ANPA, o profesorado e o equipo directivo, para unha asemblea aberta que está programada para este luns 15 de setembro ás 18:00 h nas aulas da antiga comisaría de policía, no recinto educativo do colexio, para tratar este mesmo tema (o da inclusión das instalacións policiais nas infraestruturas do CEIP) e decidir novas accións de protesta a realizar “dada”, sinalan dende a ANPA, “a resposta insultante e indignante da Consellería de Educación, a través da inspectora, o pasado mércores 10 de setembro, onde ademais de non aceptar a dimisión do equipo directivo lles obriga a resolver eles o problema da falta de titora de 3ºB co profesorado existente no colexio, que para eles é máis que suficiente, sobran mestres/as segundo as súas palabras”.
Piden ao conselleiro de Educación que “solucione dunha vez este gravísimo problema, que non pasa por outra única solución que a de nomear a un substituto como titor/a para o a mestra que se atopa en comisión de servizos autorizada dende xuño, e que que é obrigatorio por lei”.
E conclúen: “Levamos dende o primeiro día de curso en loita, reivindicando os dereitos do noso alumnado empezando pola substitución da titor/a do 3ºB de Primaria, un curso de 23 alumnos/as de 7-8 anos, algúns deles con grandes necesidades especiais; ademais deste gravísimo e inconcebíbel problema, tamén reivindicamos máis persoal de NEAE, apoio, desdobres e coidadores así como que poñan dunha vez en funcionamento o ascensor do edificio de Infantil que leva máis dun ano en construción; a reforma do edificio da vella comisaría, da cuberta do edificio de Infantil, do pavillón do colexio, do patio escolar e o pintado exterior do edificio principal; pero sen dúbida, que o urxente e inmediato e polo que non imos parar ata que se logre, é o nomeamento do titor/a para o curso de 3 ºB de E.Primaria”.
