O responsábel comarcal do BNG, Luís Pérez Barral, abriu a campaña electoral proclamando que o Bloque sae a por todas para conseguir un grupo forte no Congreso co obxectivo de facer valer Galiza en Madrid. “Que ninguén o dubide, imos a por todas para darlle a Galiza un grupo orgullosamente galego a favor do País”, asegurou.
No BNG aseguran que “é o momento de Galiza, de facer valer o noso ante o Goberno do Estado, con orgullo e con determinación” pois “Galiza xógase estar defendida no Congreso, ter a capacidade de conseguir investimentos, transferencias, melloras para o nos país”, advirten.
Aseguran que só o BNG ten as mans libres para defender os intereses da xente deste País ante un goberno do Estado. “Non queremos privilexios senón un trato xusto e digno para os galegos e galegas.
Barral lembrou que o Bloque xa ten demostrado estes anos, con Néstor Rego no Congreso, como un só deputado “fixo máis por mellorar a vida da poboación galega que os 22 restantes, esa procesión de caladiños que pulsa o botón do que lle digan nas súas sedes madrileñas”.
Superar as enquisas
O Bloque arranca a campaña co convencemento de que o 23X vai demostrar que a forza nacionalista está nun bo momento. “O 23 de xullo imos volver facelo, imos superar todas as enquisas. “Non nos marcamos límites e imos a dar o mellor de nós para conseguir que Galiza sexa determinante na política estatal”.
O BNG está aquí para ser decisivo, para romper todas as previsións e para facer historia cun grupo galego forte ao servizo deste País e da súa xente”, finalizou.
