Os obradoiros formativos sobre acoso escolar promovidos polo Instituto de Mediación Educativa de Ribeira (IMER) e a Concellería de Servizos Sociais, Promoción Social, Igualdade e Diversidade do Concello a través do CIM rematan este martes 21 de novembro cos últimos dous encontros en centros educativos locais: o IES Leliadoura (12.50 horas) e o Colexio Galaxia (16.15 horas).
En total, o Concello de Ribeira confirmou que serán máis de 200 os alumnos dos centros de Secundaria, Bacharelato e FP do termo municipal que participan nesta iniciativa que, baixo o título Dereito a saber: obradoiro sobre diversidade, busca ofrecer ferramentas para combater os casos de acoso escolar derivados de calquera tipo de discriminación e sinaladamente por razóns de orientación sexual.
As charlas están sendo impartidas por expertos pertencentes á Asociación pola Liberdade Afectivo Sexual da Coruña (ALAS), que xa pasaron polas aulas dos colexios Sagrado Corazón de Castiñeiras, Bayón e A Milagrosa de Oleiros; ademais do IE Número 1 e o CIFP Coroso. Ademais, o pasado 26 de outubro celebrouse neste último centro docente outro obradoiro destinado ao profesorado con preto de 30 mestres e mestras do municipio que recibiron formación específica sobre diversidade sexual e prevención de acoso LGTBIfóbico.
