Mala mar me deixe, dicían -hoxe non tanto porque xa non hai, prácticamente- os mariñeiros ortegaleses, máis en concreto de Cariño, cando algo saía mal porque tiña que sair así.
Mais hai ocasións -esta é unha- na que un debe botar man doutro dito dos mariñeiros cariñenses: “o demo non me nunca”, que non souben xamáis dicir o seu significado pero que ven ao fío do que agora mesmo me formulo: os eurodeputados españois, as organizacións do sector pesqueiro representadas en España e Europa, non se enteraron antes de agora dos plans do eurocomisario de Pesca, señor Sinkevicius, para vetar este outono a pesca de fondo en 87 zonas atlánticas comunitarias?. É a Comisión de Pesca, por sí soa, quen de sentar as bases que impiden a pesca de fondo entre os 400 e os 800 metros dunha superficie de mar de máis de 16.000 quilómetros cadrados sen que ninguén detectara -ata vai tres semanas- que a frota pesqueira española ía perder ducias de barcos de distintas modalidades -pero todas estas de moi directa relación coas artes de fondo- deixando en terra unha manchea de mariñeiros e no disparadoiro do achatarramento ou a venda todos aqueles buques que xa non poderán pescar nas augas nas que aprenderon ao facer a moitos homes e mulleres que hoxe se poden gabar en Europa de seren pescadores?. Que fan os deputados europeos españois intregrados nas comisións que teñen que ver co mar e a pesca?. Talvez non se enteran dos asuntos que se debaten?. É posible que toda unha organización plenamente asentada en Europa e con sede en Bruxelas como é Europêche non tivera coñecemento antes de agora do que a Comisión de Pesca do señor Sinkevicius tramaba?.
Algo cheira mal máis acó de Dinamarca para que tal e tanto silencio se botara enriba deste polémico asunto sobre o que, por certo, a patronal Cepesca falou menos ca Federación Nacional de Confrarías de Pescadores, e Cepesca ten coma secretario xeral ao presidente de Europêche.
O partido maioritario na Eurocámara é o Partido Popular Europeo, do que forma parte o PP español. Tampouco o partido da oposición en España tivo constancia da que se lle viña enriba ao sector pesqueiro español ata o de agora?.
Para min que hai moitos silencios, repito, e que o da pesca de fondo cheira a caldo de repolo, como mínimo.
Non me cadran as contas, e Sinkevicius está moi tranquilo, sumamente tranquilo. Moito máis co sector pesqueiro español que tanto depende das augas actualmente vedadas para a maioría dos barcos españois que realizan pesca de fondo.
Señor ministro de Agricultura, Pesca e Alimentación: realmente non se sabía nada en España ou houbo calada por resposta?.
