O Concello de Boiro organiza este xoves 10 de novembro de 2022 a I Olimpíada de Xogos Tradicionais Intercentros, aberta á participación dos centros de ensino do municipio. A concelleira, Dores Torrado, e a coordinadora do Equipo de Dinamización Lingüística do CEIP Santa Baia, Ana Ramos, realizaron na mañá deste 9 de novembro a presentación da actividade. Segundo confirmaron, terá lugar no Parque da Cachada, en horario de 10.15 a 13.00 horas e nela van participar os CEIP de Escarabote, Praia Xardin, Santa Baia, Santa María do Castro, Abanqueiro e Cespón; o IES Espiñeira; o Club de Bolos Boiro, a Asociación de Xogos e Deportes Tradicionais de Triñáns; Brinquedia – Rede Galega do Xogo Tradicional; e o EDLG dos centros educativos.
Torrado e Ramos explicaron tamén que a xornada vai contar cunha programación de xogos guiados na que haberá o xogo dos bolos, carreira de sacos, brilé, tiro á corda, carreira de zancos e pións, ao que se sumará unha zona de xogo libre con lanzamento de ra, chave, banco, conos… xogos de mesa, xogos de precisión como o caldeiro, as pontes, aros.. e outros xogos de forza como o lanzamento de boina e tamén xogos por parellas.
A xornada ten como obxectivo promover e dar a coñecer entre a mocidade os distintos xogos tradicionais galegos. “Detectamos nos centos que se perderon moito os xogos tradicionais, as novas xeracións non os coñecen e non saben as normas, polo que decidimos dalos a coñecer a través desta actividade”, recoñeceu Ana Ramos.
