O BNG presenta emendas aos Orzamentos da Xunta por valor de 10M€

18 Novembro 2022

O BNG presentou publicamente as emendas que rexistraron aos Orzamentos da Xunta para o ano 2023 e que ascenden a un total de 10 millóns de euros. A deputada pobrense Rosana Pérez, acompaña polo responsábel comarcal no Barbanza, o ribeirense Luís Pérez, e o concelleiro boirense Carlos Ansoar, detallou que “ é unha burla dicir que reforzan os servizos públicos e están pensados para as familias como dixo o Partido Popular, porque seguen recortando en Sanidade, Educación, non se mellora a atención de persoas maiores, por só citar algúns exemplos”.

Pérez Fernández recoñeceu botar en falta “maior investimento no ámbito sanitario” porque “seguen fechados os consultorios de Cabo de Cruz (Boiro) e Taragoña (Rianxo) e agora a veciñanza de Corrubedo xa se concentra para evitar o feche do seu centro médico”. Alén dos centros sanitarios do rural, tamén criticou o que considera “unha falta de investimentos nos xa colapsados centros de saúde de Ribeira, A Pobra, Boiro e Rianxo”.

Rosana Pérez tamén lanzou críticas sobre os investimentos para A Pobra do Caramiñal e Boiro, “xa que parece que A Barbanza só ten dous concellos” asegurou. A deputada nacionalista deu conta dunhas propostas de mellora baseadas, dixo, “nas necesidades e demandas máis urxentes e necesarias para as veciñas e veciños da Barbanza”. E engadiu: “Estas emendas son un exemplo de que cos mesmos cartos é posíbel facer unha política distinta, centrada nas necesidades actuais da veciñanza e atendendo as súas demandas, de cara á mellora económico-social dunha das comarcas máis dinámicas do país”.

Máis investimento en sanidade

Pérez Fernández detallou que nos Orzamentos levan anos consignándose partidas como a da ampliación do Hospital da Barbanza. “Dende 2020 poñen 589.200 euros no papel pero nunca se executan”, dixo, ao tempo que esixiu ampliar o hospital “dunha vez por todas”, dotar a Ribeira dunha ambulancia medicalizada, ambas emendas por valor de 660.000 euros.

Política social e educación

Os nacionalistas puxeron en valor o seu traballo para conseguir que Ribeira teña unha nova residencia pública de maiores pero ante o elevado déficit que existe e que na comarca hai 15.000 persoas maiores de 65 anos propoñen “unha partida de 2,5 millón de euros para crear outra en Boiro” e “600.000 euros para adecuar o Pazo de Rianxiño como centro de día”.

Tamén se propón a reforma integral do CEIP Castelao que “adoece dunha mellora das instalacións que permita desenvolver a súa actividade”, dixo.

Conexión ferroviaria

As emendas presentadas polo BNG recollen “unha vella demanda da veciñanza da comarca que aínda non atopou acollida nos plans económicos e de mobilidade da Xunta”. Trátase da conexión ferroviaria da Barbanza. Os nacionalistas propoñen elaborar un estudo, valorado en 500.000 euros, buscando poñer solución a unha necesidade que afecta a toda a sociedade barbancesa.

Medio ambiente, saneamento e cultura son outras das partidas que solicitan

Por último desde o BNG inciden en que “é preciso destinar 23 millóns de euros a un plan completo de rexeneración da ría de Arousa para que siga sendo un motor económico imporante”. Proponse tamén destinar 800.000 euros para completar o saneamento integral de Rianxo e 156.000 euros en musealizar a casa de Rafael Dieste. Inclúese unha emenda para investir 2 millóns de euros para mantemento dos portos e 1 para abrir canles de auga no porto comercial da Pobra. Por último tamén se inclúe a proposta de destinar 150.000 a accións específicas de conservación e educación ambiental no Parque Natural de Corrubedo.

Outros artigos

O Concello de Ribeira reforza o alumeado público na rúa de Galicia

O Concello de Ribeira informou dun reforzamento do alumeado público nalgunhas contornas do centro urbano da cidade, concretamente no treito da rúa Galicia comprendido entre o Mercado Municipal e o cruzamento co Parque García Bayón. Segundo informaron fontes do...

+

Publicidade

Revista en papel

Opinión

“Cadaquén coa súa idea”. Luís Celeiro

“Cadaquén coa súa idea”. Luís Celeiro

Fóronse onte pola madrugada e arestora aínda non chegaron. Montaron nun avión para ir a “non seionde” e, despois, un tren de longo recorrido levaríaos a outro aeroporto,  para seguir o seuprograma de turismo ofertado por unha das máis importantes axencias de turismo...

“Good morning, Baltimore”. Antón Luaces

“Good morning, Baltimore”. Antón Luaces

Este xoves foron recuperados outros dous cadáveres supostamente doutros tantos obreiros da maior infraestrutura marítima de Baltimore, considerada a de máis lonxitude de Estados Unidos, que foi derrubada o pasado martes polo portacontedores "Dalí", que bateu contra a...