Agadea retoma en Boiro o servizo de estimulación terapéutica

O Concello de Boiro colabora coa Asociación Agadea para levar a cabo no municipio un novo servizo de estimulación terapéutica. Toda a información sobre os servizos e inscricións no departamento de Servicios Sociais do Concello de Boiro ou en Agadea.
A Asociación Galega de Axuda aos Enfermos con Demencia Tipo Alzhéimer vai levar a cabo en Boiro un servizo de terapias dirixido a persoas maiores con deterioro cognitivo e persoas con demencias neurodexenerativas como o Alzheimer, frontoemportal, corpos de Lewy… “Unha actividade mais
para os boirenses e especialmente para os nosos maiores, aos que temos que coidar e darlles o mellor”, sinalou o alcalde, José Ramón Romero.
O obxectivo destas actividades é retardar o deterioro da enfermidade; traballar a memoria, a orientación, a linguaxe, o cálculo…; ou mellorar a calidade de vida e as relacións interpersoais. “Ampliamos a rede de recursos e damos unha maior oportunidade aos nosos maiores de manter un ocio activo e manter activa a súa mente. Ao tempo que ofrecemos un servizo de conciliación para as familias”, sinalou o concelleiro de Servizos Sociais, Raúl Treus.
As actividades vanse levar a cabo no Centro Social de Abanqueiro os luns, mércores e venres en horario de 15.30 a 18.30 horas. Máis información no departamento de Servicios Sociais do Concello de Boiro ou en Agadea, no teléfono 672 705 053 ou no enderezo electrónico cdiaribeira@xunta.gal.