O Concello de Boiro, a través da área de Deportes, organiza unha nova edición da Carreira Popular Mar de Boiro. 15º Memorial Pepe Buceta. Será o vindeiro domingo 4 de decembro. As inscricións están xa abertas na web de Emesports e toda a información sobre a proba na web municipal.
A proba está incluída no calendario oficial da Federación Galega de Atletismo e consta de tres categorías distintas. As carreiras Mini e Supermini de 200 metros engloba idades ata os 7 anos e sairá ás 10.40 horas da rúa peonil; a carreira curta de 2.500 metros para escolares sairá ás 11.05 horas da rúa Principal e a carreira longa, de 10.000 metros para as categorías xerais que sairá ás 11.00 horas tamén da rúa Principal.
O percorrido da carreira será pola rúa Principal e transcorrerá pola avenida de Compostela en dirección praia Xardín, percorrerá o paseo marítimo de Barraña ata o Saltiño e chegará ata Mañóns para regresar a Boiro, onde estará instalada a liña de meta na rúa Peonil.
Os trofeos premiarán aos tres primeiros clasificados de cada categoría e aos tres gañadores absolutos, tanto masculino como feminino, e tamén aos tes primeiros corredores e tres primeiras corredoras de Boiro; ao participante de maior idade e a clasificación de Sapatilla Inclusiva para persoas con discapacidade.
As inscricións están abertas ata o xoves día 1 de decembro ata as 23.59 horas na web de Emesports.
