A Xuntanza do Maior de Ribeira regresou á Fieiteira tras dous anos de pandemia

Había moitas gañas entre os participantes e, despois de dous anos sen poder celebrala por mor do covid, o Encontro das Persoas Maiores regresou hoxe domingo ao Complexo da Fieiteira con preto dun milleiro de persoas asistentes que quixeron compartir en confraternidade este xornada de domingo.
O evento estivo precedido dunha misa solemne ao mediodía no templo parroquial de Santa Uxía, oficiada polo cura Alfonso Mera e que contou coa intervención da Coral Polifónica Municipal de Ribeira.
Xa a partir da unha e cuarto abríronse as portas do recinto polideporttivo para acoller aos comensarais, que recibiron a benvida do alcalde Manuel Ruiz.

Durante a súa intervención, Ruiz Rivas puxo en valor o traballo da conselleira de Política Social na Xunta (a ribeirense Fabiola García, que non puido acudir hoxe por estar de baixa por maternidade), quen posibilitou a creación dunha Aula do Maior en Aguiño, un Punto de Encontro Familiar no Touro ou a futura Residencia da Terceira Idade, ademais de incrementar o número de horas de atención no fogar ou conquerir a gratuidade das escolas infantís municipais. O rexedor ribeirense tamén manifestou que as persoas maiores do municipio merecían esta homenaxe como un agradecemento a todo o que teñen traballado e loitado non só para a súa familia e senón tamén para mellorar o pobo. “Seguides sendo o faro e o valor principal de todas as persoas que veñen detrás”, declarou.

No nome da Consellería de Política Social compareceu o director xerente do Consorcio dos Servizos de Igualdade e Benestar, Perfecto Rodríguez, quen expresou un recordo a aquelas persoas que perderon a vida durante a pandemia, pero tamén tivo palabras de recoñecemento a quen contribuíu a facer a vida máis fácil naquela etapa: persoal sanitario, persoal de seguridade, traballadores sociais e nas residencias… Perfecto Rodríguez manifestou o compromiso da Xunta de Galicia de seguir traballando a prol das persoas maiores.

Tamén dirixiu unhas palabras á concorrencia a concelleira de Servizos Sociais, Ana Barreiro, quen de recordar que todo un programa do seu departamento está enfocado na dinamización social e cultural das persoas maiores, desexoulles unha boa xornada.
Despois do xantar tivo lugar un sorteo de obsequios entre os asistentes por cortesía das empresas Frinsa e Congalsa, antes de dar paso a un baile amenizado pola artista Mar Davila.
Entre outras autoridades estiveron na xuntanza o alcalde de Porto do Son, Luis Oujo; os patróns maiores de Ribeira e Aguiño; o comandante do EVA 10 Roberto Ruiz Rumbo, o cura párroco Alfonso Mera, os presidentes da Asociación de Empresarios, Ambar e Amas de Casa, o xefe da Policía Local, representantes da Corporación Municipal, etc.