O Concello de Boiro realizou esta tarde a inauguración do Pazo de Goiáns logo das obras de rehabilitación do inmoble principal, coincidindo coa programación das Letras Galegas 2022. Na inauguración interviron o alcalde, José Ramón Romero, e o deputado de Cultura, Xurxo Couto; e a programación contou tamén coa presentación do caderno nº6 de Follas Novas. Revista de Estudos Rosalianos; e unha actuación de Laura Lamontagne e Pico Amperio.
Na súa intervención o alcalde falou da historia do Pazo e das obras de rehabilitación que comezaron no ano 2019. “Cada detalle desta rehabilitación foi escollido con mimo e con moito gusto, intentando salvagardar todos aqueles elementos orixinais e conservar a súa esencia”, recoñeceu o alcalde. José
Ramón Romero agradeceu o traballo de todas as persoas e colectivos que traballaron para a súa recuperación e que “o Pazo de Goiáns chegue hoxe ás mans ás que pertence: ás do pobo de Boiro”.
O Concello de Boiro vai seguir traballando agora para recuperar as demais edificacións que conforman a finca e por dotar o espazo de contido, atendendo ás aportacións de colectivos e veciñanza. O deputado de Cultura, Xurxo Couto, agradeceu o convite e animou a seguir realizando actividades e eventos “neste escenario que hoxe se inaugura”.
Máis dun cento de persoas asistiron esta tarde á inauguración, entre os que estiveron membros da corporación local, ex alcaldes do municipio e membros de antigas corporacións locais, tamén representantes de entidades e asociacións e os membros da Comisión de Planificación e Futuro do Pazo de Goiáns.
A programación das Letras Galegas 2022 deu comezo coa presentación do caderno nº6 de Follas Novas. Revista de Estudos Rosalianos e que contou coa intervención de Anxo Angueira, presidente da Fundación Rosalía; e Xosé Luis Axeitos, director de Follas Novas, acompañados polo alcalde e a concelleira de Cultura. Os actos do día en Goiáns remataron co concerto de Laura Lamontagne e Pico Amperio.
A Concelleira de Cultura, María Outeiral, anunciou os cambios na programación das Letras Galegas debido á previsión meteorolóxica e convidou a toda a veciñanza a achegarse este martes a Goiáns para coñecer o Pazo, visitar o mercado de artesanía, asistir ás presentacións literarias a cargo de Barbantia, á sesión vermú con pulpeira ou o baile tradicional.
Incendio debido a unha queima en Deán en Ribeira calcina uns 300 metros cadradados
Unha queima non autorizada en Ribeira xerou a alerta a tarde deste mércores . Un particular informou ao 112 sobre un incendio nunha leira en Deán Pequeno. A pesar do despregamento de recursos,policias local e nacional, un helicóptero, dúas brigadas de medio ambiente,...