O Concello de Boiro, coa colaboración da Galería La Doce, convoca o certame Residentes: Residencias Artísticas Boiro 2022, que ten como obxectivo “incentivar a creatividade e a produción artística visual”. A concelleira de Cultura, María Outeiral, e a coordinadora de La Doce, María Magán, presentaron este luns 16 de maio pola mañá o proxecto.
Segundo dixeron, o concurso está dirixido a todos aqueles artistas que teñan como linguaxe as artes contemporáneas (pintura, escultura, vídeo, fotografía, performance) e que “busquen desenvolver un proxecto artístico ou comezar unha investigación desta índole na contorna de Boiro”. E engadiron: “Con este proxecto pretendemos fomentar a creatividade e contribuír á consolidación e crecemento do sector artístico local”.
Tamén fixeron saber que o xurado seleccionará tres proxectos artísticos e o premio consiste nunha dotación económica de 1000 euros por gañador e aloxamento durante o mes de setembro para desenvolver o proxecto.
As persoas residentes seleccionadas, engadiron, dispoñerán dun espazo de traballo na zona de coworking da Galería La Doce e do seu equipamento para poder traballar no seu proxecto.
Como contraprestación as e os artistas propoñerán unha actividade ou obradoiro dirixido á cidadanía de Boiro; cederán a súa obra durante un tempo determinado para expor; presentar o seu traballo en actos que poidan ser convocados e doar unha peza ao Concello de Boiro.
As solicitudes para participar deben presentarse a través do Rexistro Xeral do Concello de Boiro ou da sede electrónica ata o vindeiro 12 de xuño. As bases e toda a información para participar no concurso están a disposición das persoas interesadas na web municipal, www.boiro.gal.