A ABE e Cruz Vermella Boiro formalizan un acordo de colaboración

Na mañá deste martes 10 de maio a ABE e a asemblea local da Cruz Vermella de Boiro asinaron un convenio de colaboración que recolle a intención de ambas entidades en explorar liñas de traballo en común. Ao acto de sinatura asistiron por parte da patronal boirense o presidente e o xerente, Daniel García e Tomás Estévez, respectivamente, e por parte de Cruz Vermella a presidenta e o vicepresidente, Rosa Abuín e Ricardo López Triñanes, e máis a coordinadora local, Natalia Romero.

En palabras do presidente da ABE “o obxecto do presente convenio é articular a colaboración entre as entidades para establecer un punto de encontro que contribúa á difusión e mellora dos programas sociais así como a posta en marcha doutros que poidan acordarse entre as partes”

Entrando en detalle, o xerente da ABE, Tomás Estévez, debullou algunha das liñas de traballo que se van a desenvolver, como “compartir información, orientación e asesoramento” ou “establecer canles de coordinación entre os asociados/usuarios de ambas entidades”. Tamén se fomentará a realización de prácticas de carácter laboral nas empresas asociadas, dixo.

Pola sua banda a presidenta, Rosa Abuín, amosou a sua satisfacción pola sinatura deste acordo que servirá, entre outras cousas para “captar e fomentar o acceso de potenciais usuarios aos servizos de Cruz Vermella Boiro, realizar (de forma conxunta) accións de carácter social no municipio ou fomentar a inclusión laboral dos usuarios da organización humanitaria no tecido empresarial boirense”

Con este acordo a ABE quere consolidar a sua liña de traballo con outras entidades sociais do municipio ao tempo que amplía o catálogo de servizos para os seus asociados e inclúe a posibilidade de que as empresas acollan traballadores en practicas ou contratados que proveñan de colectivos en risco de exclusión e que se poidan beneficiar das axudas e bonificacións que a Xunta ten en vigor para estes colectivos.