Os Grupos de Acción Local do sector pesqueiro galego impulsa 144 novos proxectos

04 Novembro 2021

A Consellería do Mar aprobou este ano 144 novos proxectos dos grupos de acción local do sector pesqueiro (GALP), que mobilizarán preto de 15 millóns de euros. Son as iniciativas aprobadas na resolución da convocatoria de 2021 de axudas a estes grupos, na cal o Executivo galego achega algo máis de 7,5 millóns de euros -aos cales se suman máis de 7,3 millóns de investimento privado- para o desenvolvemento desas actuacións de dinamización das zonas costeiras.
Estas accións, cofinanciadas polo Fondo Europeo Marítimo e de Pesca (FEMP), desenvolveranse entre este ano e o que vén e prevén a creación de arredor de 65 empregos a tempo completo. Son datos que recolle un informe que analizou hoxe o Consello da Xunta sobre a resolución da convocatoria de achegas deste ano e os principais proxectos aprobados.
Máis da metade das iniciativas aprobadas, un total de 80, son produtivas, é dicir, de orientación empresarial ou profesional, cun importe de subvención de algo máis de 4,8 millóns de euros. Os 64 proxectos restantes son non produtivos, é dicir, aqueles que non supoñen o inicio ou desenvolvemento dunha actividade económica, cun valor total de axuda de máis de 2,8 millóns de euros.
Entre as iniciativas subvencionadas atópanse as que teñen como obxectivo o apoio á diversificación dentro e fóra da pesca comercial, á aprendizaxe permanente e á creación de emprego nas zonas pesqueiras. Tamén hai accións para aumentar o valor dos produtos pesqueiros, atraer mocidade ao sector e a promoción e innovación en todas as fases da
cadea de subministración dos produtos da pesca e da acuicultura. No caso dos proxectos non produtivos, entre os obxectivos fundamentais está o fomento do benestar social e do patrimonio cultural e ambiental das zonas pesqueiras e acuícolas.
Estes proxectos engádense aos preto de 500 desenvolvidos desde o ano 2016 e que recibiron preto de 30 millóns de euros de apoio público. Estas achegas catalizaron case 40 millóns de euros, co que as iniciativas impulsadas polos oito GALP galegos mobilizaron un investimento total de arredor de 70 millóns de euros.
Distribución por grupos
En canto á distribución por grupos, o informe mostra que 16 dos proxectos aprobados corresponden ao GALP 1 Mariña-Ortegal, cun importe total de subvención de máis de 540.000 euros. O GALP 2 Golfo Ártabro Norte conta con 35 iniciativas, cunha axuda global por valor de preto de 1,2 millóns de euros. Mentres, o GALP 3 Costa da Morte ten 13
proxectos, cun apoio superior aos 1,5 millóns de euros, e o GALP 4 Seo de Fisterra Ría de Muros e Noia: Costa Sustentable dispón de sete iniciativas cunha achega global de máis de 960.000 euros.
O GALP 5 Ría de Arousa, pola súa banda, ten 15 solicitudes aprobadas cunha axuda total de máis dun millón de euros e o GALP 6 Ría de Pontevedra conta con 27 proxectos aprobados, cun apoio de case 850.000 euros. Mentres, o GALP 7 Ría de Vigo-A Guarda ten 16 proxectos, cunha achega de 648.000 euros, e o GALP 8 Golfo Ártabro Sur ten aprobadas 15 iniciativas cun apoio público de máis de 760.000 euros.
Exemplos de proxectos aprobados
Entre os proxectos que contan con achega ao abeiro desta convocatoria está Diversiplas + Diverso – Plástico, do GALP 3 Costa da Morte, mediante o que a Asociación Íntegro promove a integración sociolaboral das persoas con diversidade funcional a través dunha iniciativa de valorización dos residuos plásticos procedentes de refugallos mariños e do sector.
Outro dos proxectos aprobados, Retornos do pasado, pretende estudar e difundir a cultura marítima de Ribadeo. No marco desta iniciativa impulsada polo GALP 1 Mariña-Ortegal, realizarase a documentación e a caracterización de restos existentes na zona e avanzarase en traballos técnicos de estudo da historia deste porto lucense.
O GALP 2 Golfo Ártabro Norte promove actuacións como Vacaloura & Amar o mar, para difundir no Mercado Municipal de Pontedeume o valor e a calidade dos produtos do mar ecolóxicos, respectuosos co ambiente e de proximidade. A el engádese o proxecto Centro de formación do mar For-Mar, que ten como obxectivo impartir formación especializada en actividades relacionadas co mar e difundir as boas prácticas no sector.

Entre as iniciativas aprobadas nesta convocatoria tamén se inclúen algunhas relacionadas co sector hostaleiro, como o Morada Atlántica, do GALP 3 Costa da Morte, para a rehabilitación de dúas vivendas centenarias e a creación dun establecemento que combinará aloxamento, taller de transformación de peixes e mariscos, experiencias de
turismo mariñeiro e exposición permanente para a interpretación e observación da cultura mariñeira.
Os GALP
Os grupos de acción local do sector pesqueiro dan continuidade aos antigos grupos de acción costeira (GAC) e son asociacións sen ánimo de lucro colaboradoras da Consellería do Mar como axentes de desenvolvemento na aplicación da Estratexia de desenvolvemento local participativo da zona pesqueira e na xestión e control das axudas que se tramitan para o desenvolvemento desa estratexia.
A actividade dos oito grupos que hai en Galicia dentro do programa operativo do Fondo Europeo Marítimo e de Pesca contribúe a mellorar a transformación, comercialización e posta en valor das producións pesqueiras, ao desenvolvemento dun sector turístico sustentable, á creación de empresas e á xeración de emprego e á diversificación do sector a través de iniciativas complementarias da actividade pesqueira como o turismo mariñeiro.
Tamén contribúe á conservación e á valorización do patrimonio natural e cultural marítimo- pesqueiro.

Outros artigos

Publicidade

Revista en papel

Opinión

“Cadaquén coa súa idea”. Luís Celeiro

“Cadaquén coa súa idea”. Luís Celeiro

Fóronse onte pola madrugada e arestora aínda non chegaron. Montaron nun avión para ir a “non seionde” e, despois, un tren de longo recorrido levaríaos a outro aeroporto,  para seguir o seuprograma de turismo ofertado por unha das máis importantes axencias de turismo...

“Good morning, Baltimore”. Antón Luaces

“Good morning, Baltimore”. Antón Luaces

Este xoves foron recuperados outros dous cadáveres supostamente doutros tantos obreiros da maior infraestrutura marítima de Baltimore, considerada a de máis lonxitude de Estados Unidos, que foi derrubada o pasado martes polo portacontedores "Dalí", que bateu contra a...