O Portus Apostoli goleou ao Parrulo nun derbi descafeinado (6-0)

O derbi galego da Segunda División Nacional quedou na vila noiesa. O Noia FS impuxo súa lei para derrotar sen contemplacións ao Parrulo Ferrol por 6-0. O obxectivo prioritario dos noieses era vencer para voltar á senda da vitoria, logo da derrota a semana pasada fronte ao Peñíscola.

Xa aos tres minutos gobernaba no electrónico o conxunto branco. Joaki desfíxose de Gozi para converter o primeiro da tarde. Dominaba o coiro e chegaba sen parar o Portus Apostoli.

O que chegaría, foi o 2-0 no minuto 10, obra de Bruno Gomes. O brasileiro bateu a meta rival cun zurdazo inapelable. O festival carioca continuou co tanto de Edu Jabá, que nun lanzamento de falta fulminou a Gozi para o 3-0. Tivo Lluc a máis clara para o cuarto, cun disparo que o porteiro parrulo desviou o xusto para que rebotara no traveseiro.


Na segunda metade a tónica sería a mesma, cun Parrulo que tentou cambiar a dinámica do encontro a través da entrada do porteiro xogador. Sen embargo, Palmas, Bruno Gomez e Chus serían os encargados de completar a goleada final.

Con este triunfo o Noia volta a sumar de tres, nun derbi especial e que serve para recuperar as boas sensacións. Esta semana o líder renderá visita ao CD Leganés FS na xornada 12 do campionato ligueiro de Segunda División.