No Son o Concello organiza un curso de balde de axudantes de cociña

O Concello de Porto do Son organiza unha actividade formativa de balde para fomentar o emprego no sector hostaleiro. Trátase do Curso Gratuíto de Axudante de Cociña, que vén con 20 horas de formación e que se desenvolve entre os días 22 e 26 de novembro, en horario de 16:30h a 20:30 horas. Será na Aula de Cociña do Viveiro de Empresas de Porto do Son. Segundo confirma o Concello, organizador da actividade, as prazas serán limitadas.

As persoas interesadas en participar deben enviar a correspondente folla de inscrición ao enderezo electrónico: jose.pazo@portodoson.gal. O prazo de presentación de solicitudes comezará o día 10 de novembro e rematará o día 16. Non se terá por admitida ningunha solicitude enviada antes ou despois de dito prazo.